Mir Membere vum Conseil d’Administration vu « LuDUS asbl. – Léieruert fir Demokratie, Uechtsamkeet a Selbstbestëmmung »  wëlle jonke Mënschen (Kanner a Jugendlechen) d’Méiglechkeet bidden, zesummen hiren Dag ze verbréngen, dobäi ze léiere sech selwer an anerer ze respektéieren an hir eege Perséinlechkeet souwéi hiert eegent Potenzial iwwer selwer gesteiert Léierprozesser ze entdecken.

Wanns du Loscht hues, da mell dech bei eis a schaff mat.

Als Psychologin a Psychotherapeutin begleet d’Myriam jonk a manner jonk Mënschen an hirer perséinlecher Entwécklung. Vun Natur aus ganz virwëlzeg a permanent um Léieren, intresséiert et sech fir pedagogesch Alternativen, ökologesch Transitioun, Shiatsu, Qigong an Uechtsamkeetsmeditatioun. Seng Fräizäit verbréngt et gär mat Liesen, Reesen an Dreemen.

De Georges schafft zënter 1986 als Enseignant am Grondschoulberäich. Hien huet Erfarung mat Kanner- a Jugendgruppen am Kader vun der Friddenserzéiung. Während 7 Joer huet hie beim soziokulturelle Radio d’Kannersendung “Krappschass & Co.” mat moderéiert. Och privat ass hie faszinéiert vun Toun a Musék. Ausserdeem intresséiert en sech fir Science Fiction, Comics, Konscht, (Poppen-)Theater, d’Natur an d’Evolutioun vum mënschleche Bewosstsin, Naturwëssenschaft, Philosophie, Ethik, Meditatioun a Yoga a fir Schräinerei, Permakultur a vegan Ernährung. Hie wandert a schnorchelt gär a spillt gär Gesellschaftsspiller.

D’Claudia ass zënter 20 Joer begeeschtert Yogaléierin a Physiotherapeutin. Dobäi steet fir si d’Relatioun vu kierperlecher a geeschteger Beweegung zuer eegener Entwécklung ëmmer am Mëttelpunkt – ganz am Sënn vum (all)deegleche Léieren a Wuessen. Wéi an hirer eegener Kannerzäit lieft si och haut mat hirer Famill d’Proximitéit zuer Natur an de Kontakt zuer Duerfgemeinschaft.
Hieren Intressi un Alternativen zum aktuelle Bildungssystem wiisst an de leschte Joren ëmmer méi, stimuléiert duerch d’Bedierfnesser vun hiren 2 Kanner an och duerch déi villfälteg Begéignunge mat anere Famillen an Erwuessenen.
Dem Claudia seng Hobbië sin hir Päerd, Wanderen an d’Natur erfuerschen, Yoga, Ernärung avm.
 

Den Horst ass e Kand vun
der Ostsee an ass am Laf vu senger villfälteger Ausbildung a berufflecher Carrière ëmmer méi zu engem Europäer ginn. Hien ass Däitschproff, Grënnungsmember an wëssenschaftlechen Direkter vun engem däitsch-hollännesche Lycée. Als systemesche Familljentherapeut
interesséieren hie besonnesch déi systemesch Aspekter an der Schoul. Säi pedagogescht Leitbild ass de léierenden Enseignant, dee mat senger
Approche de Schüler Coursën am Virwëtz gëtt. A senger Fräizäit ass hien am léifsten an der Natur, fir ze wanderen, Vëlostouren ze maachen, ze
reiden oder ze seegelen. Op sengen Ausflich huet hien ëmmer zwee, dräi Bicher am Rucksak mat dobäi.

Ech heeschen Jordi, sinn Architekt, an d’Alicia an ech sinn d’Eltere vum Arnau (9). Virun iwwer 20 Joer hunn ech eng Firma fir Architekte-Software gegrënnt. Duerno hunn ech am Fuerschungs- an Entwécklungsberäich vu verschiddenen Entreprisen a Fondatioune geschafft. Am Ament entwéckelen ech Spiller fir d’Architektur bei Grouss a Kleng ze verbreeden. No der Gebuert vu mengem Bouf hunn ech alternativ pedagogesch Usätz entdeckt an am Joer 2016 mat enger Educatrice an zwou anere Famillen zu Barcelona eng Spillschoul fir Kanner vun 2 bis 6 Joer gegrënnt (www.nuna.cat). A menger Fräizäit begeeschteren ech mech fir Velofueren, d’Natur, Theater, Radio, Schach, Logikspiller, Kreativitéit, den Entrepreneuriat an d’Konscht vum Léieren.

Als Mënsch deen sech leidenschaftlech fir Bezéiungen tëscht de Mënschen, tëscht Mënschen an der Natur sou wéi och un spirituell Aspekter vum Mënsch-Sinn intresséiert, sicht d’Vania ëmmer rëm no Alternativen zu eise kulturell dominante Referenzen, fir sech dovunner inspiréieren ze loossen an anerer ze inspiréieren. Ënnert deenen Alternativen befannen sech och Léiermodeller déi d’Entwécklung vum Mënsch an de Virdergrond setzen an an deenen d’Potenzialentwécklung an -Erfëllung vun de Jonke prioritär ass. Bestäerkt duerch sengen Erfarungen als Prozessbegleederin fir e Bewosstsinn ze schafen ronderëm Themen déi mam Zesummeliewen ze dinn hunn (anti-Diskriminatioun, gewaltfräi Kommunikatioun, Konflikter léisen, Chancëgerechtegkeet, asw.), wënscht sech d’Vania, dass et de BiergerInne vun haut a vu muer, duerch seng verschidden Engagementer, Loscht gëtt eng aner méiglech Welt zesummen ze schafen.
A senger Fräizäit liest d’Vania ganz gären, mécht Yoga, dreemt gären a freet sech einfach d’Loft ze ootme mat där eis wäertvoll Beem eis beschenken.

 

 

Fréier Membere vum Conseil d’administration vu LuDUS

Misch, Sandy, Christophe, Véronique, Mim, Diane, Lenka, Dominique a Max